දේශප්‍රේමී නාමල් විදේශීය බලවතුන්ගේ සහාය ඉල්ලයි

0
560

එක්සත් ජාතීන්ගේ සංවිධානය සහ ඇමරිකා එක්සත් ජනපදය මානව හිමිකම් මුවාවෙන් රටේ අභ්‍යන්තර කටයුතු වලට ඇඟිලි ගසන බවට චෝදනා කරන මහින්ද රාජපක්ෂ පුත්‍රයා තමන් සිරගත කිරීමට විරුද්ධව ඒ බලවතුන් දෙදෙනාට පැමිණිලි කර තිබේ.

මත්තල ගුවන් තොටුපල සහ හම්බන්තොට වරාය ඉන්දියාවට විකුණන බවට චෝදනා කරමින් ඊට විරෝධය පා සංවිධානය කළ උද්ඝෝෂණය නාමල් රාජපක්ෂ, ඩී.වී. චානක සහ ප්‍රසන්න රණවීර යන පාර්ලිමේන්තු මන්ත්‍රීවරුන් 10 අඟහරුවාදා හම්බන්තොට පොලිසිය විසින් අත්අඩංගුවට ගෙන අධිකරණයට ඉදිරිපත් කිරිමෙන් පසුව ඔක්තෝබර් 16 දක්වා රක්ෂිත බන්ධනාගාර ගත කරන ලදී.

“ජාතික දේපළ විකිණිමට විරුද්ධ වු අප ශ්‍රී ලංකා පොලිසිය අත්අඩංගුවට ගනු ලැබුවා” යනුවෙන් සිය ට්විටර් ගිණුමේ පණිවුඩයක් තබා ඇති නාමල් රාජපක්ෂ “මෙය විරුද්ධ පක්ෂයේ හඬ යටපත් කිරීමක්” යන්නද එහි සඳහන් කර ඇත.

සිය පණිවුඩය එක්සත් ජාතින්ගේ මානව හිමිකම් කොමිසමේ සහ ඇමරිකා එක්සත් ජනපද තානාපතිනි නික් හේලි ගේ අවධානයට යොමු කර තිබේ.

සිය පියා ජනපති ධුර‍ය හොබවන සමයේ මානව හිමිකම් කොමිසම සහ ඇමරිකාව විසින් උතුරේ සිදු වු යුද අපරාධ සම්බන්ධයෙන් ප්‍රශ්න කරන විට එයට මන්ත්‍රීවරයා දැඩි විරෝධය පල කළේ රටේ අභ්‍යන්තර කටයුතු වලට ඇඟිලි ගැසීමක් ලෙසයි.

LEAVE A REPLY