“රෝහින්ග්‍යා ඝාතනයන්ට එරෙහි වන්න” මලාලා යුසුෆායි ගෙන් අවුන් සාන් සුචිට අභියෝගයක්

0
235

මියන්මාරයේ රෝහින්ග්‍යා වැසියන් සිය ගණනක් ජිවිතක්ෂයට පත්කළ “නින්දා සහගත ඛේදජනක” ප්‍රචණ්ඩ ක්‍රියා හෙලා දැකීමට කටයුතු කරන ලෙස නොබෙල් සාම ත්‍යාග ලාභී මලාලා යුසුෆායි, එම සම්මානයෙන්ම පිදුම් ලැබූ අවුන් සාන් සුචි ගෙන් ඉල්ලා තිබේ.

දස දහස් ගණනක් ජනතාව අසල්වැසි බංග්ලාදේශයට පලා යාමට හේතු වුනු අර්බුදකාරී වාතාවරණය අවසන් කිරීම සඳහා ක්‍රියා කරන තෙක් “ලෝකයා බලා සිටින බව” මලාලා නිකුත් කළ ට්විටර් සමාජ ජාලා පණිවිඩයක සඳහන් වේ.

සුළුතර ජනවාර්ගික කණ්ඩායමකට සලකන ආකාරය නිසා රටෙහි කීර්තියට හානියක් වන බව බ්‍රිතාන්‍ය විදෙස් කටයුතු පිලිබඳ රාජ්‍ය ලේකම් බොරිස් ජොන්සන් විසින් මියන්මාර පාලක පක්ෂ නායිකාව වෙත අනතුරු ඇඟවීමෙන් අනතුරුව මලාලා මෙම පණිවිඩය නිකුත් කර ඇත.

ආරක්ෂක අංශ විසින් කුඩා දරුවන් ඝාතනය කළ බව සඳහන් වාර්තා නිසා තමන් සිත් තැවුලට පත්ව ඇති බවත් මෙම කණ්ඩායමට පුරවැසිභාවය ලබා දීමට කටයුතු කරමින් ඛේදවාචකයට අවසානයක් ලබා දෙන ලෙසත් මලාලා ඉල්ලීමක් කර තිබේ.

“පසුගිය වසර ගණනාවක් පුරාවට පැවති නින්දා සහගත මෙම ශෝචනීය සහ ලැජ්ජා සහගත සැලකිල්ල හෙලා දැකීමට මම කිහිප වතාවක්ම කටයුතු කළා,” යනුවෙන් පවසන ඇය “මා මෙන්ම නොබෙල් සාම ත්‍යාගයෙන් පිදුම් ලැබූ අවුන් සාන් සුචි ද එසේ කරාවි යැයි මම තවමත් බලා සිටිනවා. ලෝකය බලා සිටිනවා, රෝහින්ග්‍යා මුස්ලිම් වැසියන් බලා සිටිනවා.”

පසුගිය අගෝස්තු 25 සිට ඔඩු දිවීමට පටන් ගත් ප්‍රචණ්ඩ ක්‍රියා නිසා 73,000 ක් පමණ දේශ සිමා තරණය කොට බංග්ලාදේශය වෙත පලා ගොස් ඇතැයි එක්සත් ජාතීන්ගේ සරණාගත කාර්යාංශය ගණන් බලා තිබේ.

LEAVE A REPLY