ජනපති ළඟ අගමැතිට ඔත්තු සපයන්නෙක්

0
278

ජනාධිපති මෛත්‍රීපාල සිරිසේන සමඟ සිටිමින් අග්‍රාමාත්‍ය රනිල් වික්‍රමසිංහ හට ඔත්තු සපයන්නෙක් සිටින බව ජනාධිපති කාර්යාල අභ්‍යන්තර ආරංචි මාර්ගවලින් හෙළිව ඇතැයි ශ්‍රී ලංකා මිරර් වාර්තා කරයි.

බැඳුම්කර සිද්ධිය සම්බන්ධයෙන් සොයා බැලීමට ජනාධිපති විමර්ශන කොමිසම පත් කිරීමට පෙර ඒ සම්බන්ධ තීරණය ගෙන ඇත්තේ ජනාධිපතිවරයා හා ඔහුට සම්බන්ධ කිට්ටුම පුද්ගලයන් සිවුදෙනෙකු අතර ජනපතිවරයාගේ නිවසේ සිදුකළ රහස් සාකච්ඡාවකින් පසුවය.

එම සාකච්ඡාවේදී බැඳුම්කර සිද්ධියට ජනාධිපති කොමිසමක් පත් කිරීමට තීරණය කිරීමෙන් පසුව ඔවුන් විසිර ගොස් ඇති අතර සාකච්ඡාවට සම්බන්ධ වූ අමාත්‍යවරයෙක් සිය නිවසට යමින් සිටියදී සංවර්ධන උපාය මාර්ග හා ජාත්‍යන්තර වෙළඳ අමාත්‍ය මලික් සමරවික්‍රමගෙන් දුරකථන ඇමතුමක් ලැබී තිබේ.

ඇමතුම දුන් අමාත්‍ය මලික් සමරවික්‍රම සාකච්ඡාවට එක්වූ අමාත්‍යවරයාගෙන් විමසා ඇත්තේ ජනපතිවරයා සමඟ පැවති සකච්ඡාවක පිළිබඳව සහ බැඳුම්කර සිද්ධියට ජනපති කොමිසමක් පත් කිරීමට ගත් තීරණය සම්බන්ධවයි.

අදාළ සාකච්ඡාව පැවැත්වෙන අවස්ථාවේ අගමැතිවරයා සිට ඇත්තේ විදෙස්ගතව වන අතර අමාත්‍ය සමරවික්‍රම අදාළ අමාත්‍යවරයාට වැඩිදුරටත් පවසා ඇත්තේ තව ටික වේලාවකින් අගමැති රනිල් වික්‍රමසිංහ දුරකථන ඇමතුමක් දෙනු ඇති බව සහ ඊට පිළිතුරු දෙන ලෙසයි.

ඉන් සුළු මොහොතකට පසුව අගමැතිවරයා එම අමාත්‍යවරයාට දුරකථන ඇමතුමක් දී ඇමති මලික් විමසූ කරුණු හා තවත් කාරණා අදාල ඇමතිවරයාගෙන් විමසා ඇති බව ඉතා විශ්වාස කටයුතු ආරංචි මාර්ගයකින් වාර්තා වු බවයි ශ්‍රී ලංකා මිරර් පවසන්නේ.

LEAVE A REPLY